အလုံးစုံဆက်ကပ်အပ်နှံခြင်းမှသည် အောင်မြင်ခြင်းသို့ - Sweetie(ပုသိမ်)

Saturday, 19 September 2009 21:42 administrator Spritual

Sweetie(ပုသိမ်)

ယနေ့ကမ္ဘာပေါ်တွင် ခရစ်ယာန်ဘာသာကို ကိုးကွယ်သောသူများသည် ကမ္ဘာ့လူဦးရေ ကိန်းဂဏန်းအရ အများဆုံးဟု သိရှိရပါသည်။ သို့သော် ဤမျှလောက်များပြားလှသော ကိန်းဂဏန်းများအနက် အရေအတွက် မည်မျှဘုရားသခင်အား အမှန်တကယ်ချစ်၍ မိမိတို့၏ အသက်တာအား ဘုရားသခင်အတွက် ဆက်ကပ်ကြပါသနည်း။

ကျွန်မတို့ ခရစ်ယာန်အများအပြား ဘုရားသခင်၏ သနားခြင်း ၊ ချစ်ခြင်း ၊ မေတ္တာ ၊ လူသားများအပေါ် ချစ်လွန်းသည့်အတွက် မိမိ၌တပါးတည်းသော သားတော်ကို စွန့်သည့် တိုင်အောင် ချစ်တော်မူသော အဂ္ဂါပေမေတ္တာတော်ကို ကြားဖူးသိဖူးကြပါသည်။ ကျွန်မ ကိုယ်တိုင် သည်လည်း ဘုရားသခင်သည် မိမိ၌တပါးတည်းသော သားတော်ကို စွန့်တော်မူ သည့်တိုင်အောင် လောကီသားများကို ချစ်သည်မှာ ဟုတ်သည်ဟု ခံယူသည့် အဆင့်မှာသာ ရှိသည်။ သို့သော် နက်နက်နဲနဲ တွေးတောဆင်ခြင်မိခြင်းကား မရှိခဲ့ပေ။ ဘုရားသခင် ကိုယ်တော်တိုင် ကျွန်မအား လူသားများအပေါ် ချစ်သည့် ချစ်ခြင်းမေတ္တာ၏ နက်ရှိုင်းမှုကို ဖော်ပြသည့်အခါတွင်မှ သူ၏မေတ္တာကို ကောင်းစွာနားလည်ခံစားမိခဲ့ရသည်။

လွန်ခဲ့သော ( ၅ )နှစ်ခန့်က ဘုရားသခင်အား ၀ိညာဉ်တော်က ဖော်ပြသော ဆုတောင်းခြင်းနည်းလမ်းအတိုင်း နှုတ်ကပတ်တော်ကို ဆင်ခြင်အောက်မေ့လျက် ဂုဏ်တော် ချီးမွမ်းနေစဉ် ဘုရားသခင်ကိုယ်တော်တိုင် ကျွန်မအား မေးခွန်းမေးခဲ့ပါသည်။ မေးခွန်းဆိုသော် လည်း လူသားများ စကားပြောသကဲ့သို့ မဟုတ် ၊ တခဏချင်းတွင် အလုံးစုံကို သိမြင်ခြင်းဖြစ်သည်။ တခဏချင်း ကျွန်မသိလိုက်သည်မှာ အကယ်၍ သင်၏သားကို သခင် ခရစ်တော်ကဲ့သို့ ကားတိုင်လမ်းကို လျှောက်ခိုင်းလျှင် သင်သူ့အားပေးမည်လားဟု နားလည်သည်သာမက သူ၏တပါးတည်းသော သားအား ပေးလိုက်စဉ် သူခံစားရသော နာကျဉ်မှုကို ကျွန်မ ခံစားသိရှိလိုက်ရသည်။ မိမိ၌ တစ်ပါးတည်းသောသားသည် ၊ ဝေဒနာများကိုခံလျက် ကားတိုင်လမ်းလျှောက်ရမည်ကို ကြိုတင်သိမြင်သော ဖခင်တစ်ယောက်၏ ခံစားချက်ကို ကျွန်မ ခံစားလိုက်ရသည်။ ထိုအချိန်တွင် ကျွန်မ၏ နှလုံးသားမှာ နက်ရှိုင်းစွာ နာကြင်ခံစားရသည်သာမက မျက်နှာပြင်ပေါ်မှ မျက်ရည်များ လှိမ့်ဆင်းလာပါသည်။ ကျွန်မ၏ နှုတ်မှလည်း ကိုယ်တော် ကျွန်မ၏ သားကို ထိုကဲ့သို့ သော လမ်းမျိုးလျှောက်ရန် တောင်းသော် ကျွန်မ မပေးနိုင်ပါ။ မိခင်တစ်ယောက်၏ သားအပေါ်ထားသော ချစ်ခြင်းမေတ္တာအနေဖြင့် ကိုယ်တိုင်ပင် သားနေရာ ကိုယ်စားဝင်ခံပါမည်ဟု လျှောက်ထားမိပါသည်။ ထိုအချိန်တွင်မှ ဘုရားသခင်၏ လူသားများအပေါ်ထားသော အဂ္ဂါပေမေတ္တာ၏ အတိမ်အနက်ကိုကောင်းစွာ နားလည်သဘောပေါက်မိခဲ့ပါသည်။

နှုတ်ကပတ်တော်တွင်လည်း ဥပမာများဖြင့် သူ၏ချစ်ခြင်းမေတ္တာအကြောင်း ဖော်ပြခဲ့ပါသည်။ ရှင်လုကာ အခန်းကြီး (၁၅) ၊ အငယ် ၃ မှ ၇ တွင် ပျောက်သော သိုး ဥပမာ ၊ ရှင်လုကာ အခန်း ၁၅ ၊ အခန်းငယ် ၈ မှ ၁၀ တွင် ပျောက်သောဒင်္ဂါးပြား ဥပမာ ၊ ရှင်လုကာ အခန်းကြီး ၁၅ ၊ အခန်းငယ် ၁၁ မှ ၃၂ တွင် ပျောက်သောသား ဥပမာ ၊ စသည်ဖြင့် ဥပမာများဖြင့် ဘုရားသခင်၏ ချစ်ခြင်းမေတ္တာတော် အကြောင်း ဖော်ပြထားကြောင်း တွေ့ရပါသည်။ ပျောက်သောသိုး ဥပမာတွင် သိုးတစ်ကောင်သည် လမ်းမှားသွားသဖြင့် မိမိ၏ သခင်ဆီသို့ ပြန်မလာတတ်သည့်အတွက် သခင်ကိုယ်တိုင်မှ မတွေ့တွေ့အောင် ရှာဖွေပြီး ၀မ်းမြောက်စွာဖြင့် သိုးခြံထဲသို့ ပြန်လည်ခေါ်ဆောင်ခဲ့ကြောင်း တွေ့ရပါသည်။ ပျောက်သော ဒင်္ဂါးဥပမာတွင် ဒင်္ဂါးပြားသည် မိမိကိုယ်တိုင်မိမိ ပျောက်လို့ပျောက်မှန်း မသိပါ။ သိုးသည် မိမိ ကိုယ်ကို ပျောက်မှန်းသိပါသော်လည်း ပြန်မလာတတ်ပါ။ ဒင်္ဂါးပြားသည် မိမိ၏ အိမ်ထဲတွင်ပင် ပျောက်လျက်ရှိပါသည်။ အဓိပ္ပါယ်မှာ အိမ်သည် အသင်းတော်ကို ရည်ညွှန်းပါသည်။ အသင်းတော်ထဲတွင် မိမိကိုယ်ကို မိမိပျောက်၍ ပျောက်နေမှန်းမသိသောသူများကို ဘုရားသခင်သည် မုဆိုးမကဲ့သို့ မရမက ရှာဖွေခဲ့ပြီး ၀မ်းမြောက် စွာဖြင့် သူ၏ နိုင်ငံတော်ထဲသို့ ပြန်လည် ပို့ဆောင်ခဲ့ပါသည်။ ပျောက်သောသား ဥပမာတွင် သားကိုယ်၌က မိမိကိုယ်ကို ပျောက်ချင်၍ ပျောက်နေကြောင်း တွေ့ရပါသည်။ ဆိုလိုသည်မှာ ဆိုးသွမ်းခြင်းသည် မကောင်းမှန်းသိလျက်နှင့်ပင် ဆက်လက်ဆိုးသွမ်းလျက်ရှိကြောင်း တွေ့ရပါသည်။ သောက်စား မူးယစ်ပျော်ပါးပြီး ၊ ဖခင်ထံမှ အမွေများကုန်၍ စားစရာ မရှိသောအခါမှ နောင်တရကာ ဖခင်ထံသို့ ပြန်လာကြောင်း တွေ့ရသည်။ သို့သော် ဖခင်သည် ပျောက်သောသားအား ၀မ်းမြောက် စွာ ကြိုဆိုပြီး ၊ ယခင်သား ရာထူးကို ပြန်လည်ပေးသနားခဲ့သည်။ ဥပမာ သုံးခုစလုံးကို ခြုံ၍ ကြည့်လျှင် မိမိကိုယ်တိုင်ပျောက်မှန်းသိသော်လည်း ပြန်မလာတတ်သော သိုး ၊ မိမိကိုယ်ကို ပျောက်၍ပျောက်မှန်းမသိသော ဒင်္ဂါးပြား ၊ မိမိကိုယ်၌က ပျောက်ချင်၍ ပျောက်နေသော သား စသည်ဖြင့် မည်သို့ပင် ပျောက်စေကာမူ ဘုရားသခင် သည် မိမိ၏ သားသမီးများကို မရမက ရှာဖွေပြီး သူ၏ နိုင်ငံတော်တွင်းသို့ ပို့ဆောင်ပေးလျက်ရှိကြောင်း နှုတ်ကပတ်တော်က ဖော်ပြထားပါသည်။ ထို့ပြင် ဥပမာ သုံးခုစလုံးတွင် ပျောက်သော သားသမီးများ သူ၏ နိုင်ငံတော်သို့ ပြန်လာသောအခါ အလွန်ပင်ဝမ်းမြောက်ကြောင်း ဖော်ပြထားသည်။ ထို့ကြောင့် ဤဥပမာများကို ဖတ်ရှုရခြင်းဖြင့် ဘုရားသခင်၏ ကျွန်မတို့အပေါ် ထားရှိသော မေတ္တာအတိမ်အနက်ကို သိရှိနိုင်ပါသည်။

ဤမျှလောက်ချစ်သော ဘုရားသခင်အား ကျွန်မတို့ အဘယ်ကဲ့သို့ ဘုရားသခင်၏ ကျေးဇူးတော်ကို ပြန်လည်ဆပ်မည်နည်း။ အဖြေမှာ - ဘုရားသခင်သည် ကျွန်မတို့၏ အသက်တာအားလုံးကို ဆက်ကပ်စေလိုခြင်းပင်ဖြစ်သည်။ ရောမ ၁၂း၁ တွင် “ညီအစ်ကိုတို့ အသက်ရှင်ခြင်းလက္ခဏာ ၊ သန့်ရှင်းခြင်းလက္ခဏာ ဘုရားသခင် နှစ်သက်တော်မူဘွယ်သော လက္ခဏာနှင့် ပြည့်စုံသော ယဇ်ကိုသင်တို့သည် ပူဇော်၍ မိမိကိုယ်ခန္ဓာကိုဘုရားသခင်အား ဆက်ကပ်ခြင်းတည်းဟူသော သင်တို့ပြုအပ်သော ၀တ်ကိုပြုမည်အကြောင်း ၊ ဘုရားသခင်၏ ကရုဏာတော်ကို ထောက်ထား၍ သင်တို့ကို ငါတိုက်တွန်းနှိုးဆော်ပေ၏လို့ ဖော်ပြထားသည်ကို တွေ့ရသည်။ ဘုရားသခင်အား ဆက်ကပ်ခြင်း ဆိုသည်မှာကော အဘယ်သို့နည်း။ ယနေ့ ခရစ်ယာန်မြောက်မြားစွာ မိမိတို့ရှိရာနေရာကဏ္ဍအသီးသီးတွင် အသက်တာများကို ဆက်ကပ်လျက်ရှိကြောင်း တွေ့ရှိရသည်။ မိမိတို့ တတ်နိုင်သည့်အတိုင်း ကောင်းနိုးရာရာဖြင့် မိမိ၏ ဥာဏ် ၊ မိမိ၏ အကြံအစည်များဖြင့် လုပ်ဆောင်လျက် ရှိနေကြသည်။ သို့သော် အချိန်ကုန်လူပင်ပန်း၍ အရာမရောက်ဘဲ ရှိနေတတ်သည်။ ကျွန်မအား ဘုရားသခင်ဖော်ပြသော အသက်တာ ဆက်ကပ်ခြင်းမှာ ထိုကဲ့သို့မဟုတ်ပေ။ ပထမဦးစွာ မိမိ၏ အသက်တာကို ဘုရားသခင်၏ လက်ထဲလုံးဝအပ်နှံထားရပေမည်။ ကျွန်ုပ်၏ အကြံအစည် ကျွန်ုပ်၏အတွေးအခေါ်များကို ခဏဘေးဖယ်၍ ဖဘုရားသခင်အား ကျွန်ုပ်ရှိပါ၏ အလိုတော်ရှိရာ ခိုင်းစေတော်မူပါဟု ဆုတောင်းရမည်။ ထိုကဲ့သို့ ဘုရားသခင်ထံတော်ပါး၌ တိုးဝင်ချဉ်းကပ်၍ ဆုတောင်းလျှင် နှုတ်ကပတ်တော်မှသော်၎င်း ၊ စိတ်နှလုံးထဲမှသော်၎င်း ၊ ဘုရားသခင် မိမိအား ခိုင်းစေလိုသောအရာကို သိရှိလာလိမ့်မည်ဖြစ်သည်။ ကျွန်မသည်လည်း ထိုကဲ့သို့သော အသက်တာမျိုးဖြတ်သန်းခဲ့ရသည်။ ထို့ကြောင့်သာ ဘုရားသခင်၏ အကြံအစည်တော်သည် မိမိကြံစည်မျှော်မှန်းထားသည်ထက်ပို၍ ပြည့်စုံပြီး ထိရောက်ကြောင်း ၊ အောင်မြင်ကြောင်း သိရှိခဲ့ရသည်။ တခါတရံတွင် မိမိမလုပ်ချင်သော ကြောက်ရွံသောအလုပ် မျိုးကို ခိုင်းစေတတ်သည်။ ကျွန်မသည် ဘုရားကျောင်းတွင် အသက်တာ ဆက်ကပ်ခြင်းအကြောင်း တိုက်တွန်းနှိုးဆော်ရာ ခရစ်ယာန်အများစုသည် မိမိတို့အသက်တာ အား ထိုကဲ့သို့ အလုံးစုံဆက်ကပ်ခြင်းမျိုးလုပ်ဆောင်ရန် တွန့်ဆုတ်နေ တတ်သည်ကို တွေ့ခဲ့ရသည်။

မိမိတို့၏ဆန္ဒ လုပ်ဆောင်လိုသောအရာနှင့် ဘုရားသခင်စေခိုင်းသောအလုပ်တို့ တစ်ထပ်တည်းမကျဘဲ ဆန့်ကျင်ဖက် ဖြစ်နေမှာကို စိုးကြောက်သည်။ ထို့ကြောင့် မိမိဖြစ်ချင်လိုသော ဆန္ဒ လုပ်ဆောင်လိုသောအရာကိုသာ နားညောင်းရန် တောင်းလျှောက်တတ်ကြသည်။ ထိုကဲ့သို့သော အဖြစ်မျိုးသည် ကိုယ်တော်ရှင် လိုလားသော အလုံးစုံဆက်ကပ်အပ်နှံသော အသက်တာမျိုးမဟုတ်ပေ။ ကိုယ်တော်ရှင်၏ ဆန္ဒနှင့် အလိုတော်မဟုတ်သောကြောင့် ထိုသူတို့၏ အသက်တာတွင် သန့်ရှင်းသော ၀ိညာဉ်တော်၏ တန်ခိုးအစွမ်းသတ္တိဖြင့် အပြည့်အ၀ မလုပ်ဆောင်နိုင်ချေ။ အဘယ်ကြောင့်ဆိုသော် မိမိတို့၏ ဆန္ဒကိုရှေ့တန်းတင်၍ မိမိတို့ လုပ်လိုသော အရာကိုသာလျှင် လုပ်ဆောင်သောကြောင့်ဖြစ်သည်။ ထိုကဲ့သို့ လုပ်ဆောင်ခြင်းကြောင့် စိတ်ပန်းလူပန်းဖြစ်ခြင်း ၊ အချိန်ကုန်သော်လည်း တန်ခိုးမပါရှိသောကြောင့် အချည်းနှီး ဖြစ်ခြင်း ၊ အရေးကြီးဆုံးမှာ ဘုရားသခင်၏ အလိုတော်နှင့် မညီသောကြောင့် ဘုရားသခင်၏ ရှေ့တော်၌ မျက်နှာမရခြင်း တို့ဖြစ်သည်။ အမှန်တကယ်ဆင်ခြင်စဉ်းစားကြည့်လျှင် ကျမ်းစာထဲတွင် ဖော်ပြထားသည့်အတိုင်း “ငါ၏ အကြံအစည်သည် သင်တို့၏ အကြံအစည်နှင့်မတူ ။ ငါ၏ အကျင့်သည်လည်း သင်တို့၏ အကျင့်နှင့်မတူ၊ မိုးကောင်းကင်သည် မြေကြီးထက်သာ၍ မြင်သကဲ့သို့ ငါ၏ အကျင့်သည် သင်တို့၏ အကျင့်ထက်၎င်း ၊ ငါ၏ အကြံအစည်သည် သင်တို့၏ အကြံအစည်တက်၎င်းသာ၍ မြင့်၏” ဟု ဖော်ပြထားသည်။ အောင်မြင်သော အသက်တာရရန်လိုလားသူတိုင်း ၊ မိမိအသက်တာကို ဘုရားသခင်၏ လက်ထဲလုံးစုံဆက်ကပ် အပ်နှံလုပ်ကိုင်ဆောင်ရွက်ရမည်။

အိုးထိန်းသမား (ဘုရားသခင်)လက်ထဲသို့ မိမိတို့ (ရွှံ့)ကို လုံးဝအပ်နှံထားသောအခါ အလှပဆုံး ၊ အကောင်းမွန်ဆုံးလက်ရာအမြောက်ဆုံး အိုးတစ်လုံး ဖြစ်လာမည်မှာ ဧကန်မလွဲပင် ဖြစ်သည်။ သို့ဖြစ်၍ ယနေ့မှစ၍ မိမိတို့၏ အသက်တာများကို ဘုရားသခင် အလိုတော်အတိုင်း အလုံးစုံဆက်ကပ်အပ်နှံကြပါစို့ဟု မေတ္တာဖြင့် တိုက်တွန်းနှိုးဆော် လိုက်ပါ သည်။

Sweetie(ပုသိမ်)